CONVOCATORIA DE PROXECTOS TEATRAIS PARA O 2012

A todos os socios e socias de "O aturuxo de Melpomene". Ábrese o prazo de presentacion de proxectos teatrais para o próximo ano 2012.

A continuación detallamos os diversos pontos que debe incluír o proxecto:

1. TITULO. Texto e autor/autora do mesmo.

2. RECURSOS HUMANOS.

2.1. ELENCO. A proposta debe incluir os nomes das persoas asociadas que se compromenten a participar como elenco, con todas as implicacións que isto conleva (disposición para o período de montaxe recollido no proxecto, disponibilidade para as actuacións no tempo en que a obra se manteña en cartel, etc). Polo tanto, estas persoas deben estar informadas da sua inclusión no proxecto e conformes coa mesma.

2.2. DIRECCIÓN. O proxecto debe incluír o nome da persoa proposta para a dirección. Esta persoa debe ter experiencia "profesional" na dirección de espectáculos teatrais, promovendo unha calidade e rigor na montaxe e dirección da obra. No proxecto debe estar incluído o seu cache. Dado que o proxecto non estará aprobado ate que sexa escollido pola asemblea, o contacto coa persoa debe ser informativo e non un acordo formal.

2.3. AXUDANTE DE DIRECCIÓN. O proxecto incluirá unha persoa asociada que ocupará o posto de axudante de dirección sendo a responsable das tarefas que isto implica (estar presente durante a montaxe e colaborar co director/a nas diversas actividades que se acorden). A persoa que asuma este posto terá a responsabilidade de "Director/a en xira" unha vez estreada a obra.

2.4. PRODUCIÓN. Incluirase a unha persoa responsable da produción do espectáculo, que deberá coordinar e xestionar as tarefas que engloba este posto (xestión de recursos económicos acorde ao proxecto presentado, adquisición de recursos materiais, planificación de tempos e pasos a dar na montaxe, etc).

2.5. AXUDANTE DE PRODUCIÓN. Un socio ou socia asumirá as labores de axudante de produción, que estará encargado/a de colaborar co productor/a axundándolle nas labores antes indicadas.

2.6. DISTRIBUCIÓN. No proxecto incluirase a unha persoa asociada para levar a distribución da obra. Este posto implica a planificación da distribución do espectáculo (cando se vai realizar cada paso, quen se fai reponsable, etc) e a xestión da mesma (contactos de distribución, espazos, envio de publicidade, detallar necesidades de publicidade, etc). O posto implica a incorporación á equipa de distribución da asociación. Así durante o tempo en que a obra se manteña en cartel (período mínimo esixido: dous anos) formará parte desta equipa, onde os seus membros irán rotando, é decir, a persoa nova incorpórase á equipa anterior relevando a un membro e formándose durante ese ano, para no segundo ano quedar como persoa formada e acompañar á nova incorporación, e así sucesivamente.
A razón pola que este posto ten estas implicacións é que na actualidade, na asociación hai diversos espectáculos en cartel, e carecería de lóxica algunha que para cada espectáculo tiveramos unha persoa distinta na distribución.

2.7. AXUDANTE DE DISTRIBUCIÓN. Será a persoa encargada de colaborar co distribuidor/a do espectáculo, tanto na sua planificación como na súa execución (contactar cos espazos, enviar a publicidade, etc). Este posto non é imprescindible. Só se incluirá se hai persoas interesadas en asumilo.

2.8. DESEÑO DE PUBLICIDADE. No proxecto indicarase o nome da persoa asociada que se responsabilizará do deseño do material de publicidade. Esta persoa debe coordinarse coa produción (para a planificación dos tempos) e coa distribución (tamén para a planificación dos tempos e para cubrir as necesidades que se indiquen), e de ser o caso, coa dirección do espectáculo se queren realizar algunha suxerencia. Entre as tarefas máis comúns estarán o deseño do cartaz, programas de man, etc.

2.9. DESEÑO DE LUCES. Neste posto pode figurar algunha persoa da asociación con experiencia neste ámbito, ou ben un profesional que sería contratado para a realización do mesmo, neste último caso o proxecto debe incluir o cache desta persoa.

2.10. TÉCNICO/A DE LUCES. Unha persoa asociada debe asumir a tarefa de Técnico/a de luces, o que implica acompañar a toda a equipa nas diversas representacións que xurdan coa función de manexar a equipa de iluminación e cubrir as necesidades lumínicas da obra nos diversos espazos de actuación.

2.11. TÉCNICO/A DE SON. Unha persoa asociada debe asumir a tarefa de T. de son, o que implica acompañar a toda a equipa nas diversas representacións que xurdan coa función de manexar a equipa de son e cubrir as necesidades sonoras da obra nos diversos espazos de actuación. Este posto só será preciso no caso de existir tales necesidades sonoras. Tamén pode darse a posibilidade de que o posto o cubra outra persoa que esté asumindo outra función (por ex. o T. de luces, produción ou o Ax. de Dirección).

3. RECURSOS MATERIAIS.
O proxecto debe incluir todos aqueles recursos materiais que serán precisos para a montaxe da obra, así como unha estimación económica dos gastos que conlevan. Os cambios no presuposto final, só se poderán realizar baixo aprobación en asamblea ordinaria ou extraordinaria.

3.1. ESCENOGRAFÍA. Proposta de escenografía para a montaxe e/ou unha estimación do custo da mesma.

3.2. ATREZZO. Necesidades que o texto marca de atrezzo. Cando menos, estas deberán estar recollidas, así como o seu custo estimado.

3.3. VESTIARIO. Unha estimación das necesidades de vestiario que serán precisas para o desenvolvemento da obra.

3.4. MAQUILLAXE. Unha estimación das necesidades de maquillaxe que serán precisas no desenvolvemento da obra.

3.5. OUTROS. Indicaranse aqueles recursos materiais que de antemán están marcados como imprescindibeis para abordar a montaxe da obra.

** Todos os apartados aquí recollidos serán considerados flexibeis, posto que “a posteriori” poderán estar suxeitos a cambios por necesidades de dirección. En todo caso a estimación de gastos debe ser o mais acorde cos custos finais da obra.

4. RECURSOS ECONÓMICOS.

Neste apartado recollerase unha relación detallada de todos os custos que terá que afrontar a asociación para a posta en marcha desta montaxe, así como unha estimación dos custos que se derivarán da distribución da mesma (por exemplo: como se organizarán os traslados aos lugares de actuación, nº de coches necesarios para o traslado, se están cubertas as necesidades de traslado da escenografía, se ser a preciso o aluger dunha furgoneta, etc).
O custo total do proxecto será o número que na montaxe da obra se deba ter en conta para a distribución económica da mesma (pago da dirección, adquisición da escenografía, etc), sendo a cifra límite que non deberá ser revasada na propia montaxe. De ser a obra escollida, e no caso de que a montaxe posterior requerise dunha inversión maior, será precisa a consulta previa coa equipa directiva e no seu caso (de ser unha cantidade economica significativa) coa asemblea, para a aprobación dunha nova partida económica.

5. PLANIFICACIÓN.

O proxecto debe incluir unha planificación temporal que recolla entre outros os seguintes aspectos:

5.1. PERIODO DE MONTAXE. Deberá estar detallado o período temporal da montaxe (por exemplo o mes de setembro), incluindo o nº de horas destinado ao mesmo (ex. 4 horas diarias, 6 horas luns-mercores-venres...), horario detallado, lugar de realización (preferentemente o local da asociación), etc.

5.2. DISTRIBUCIÓN. Detallar a planificación da distribución (tempos para a tarefas: publicidade, contactos cos espazos, etc).

5.3. ESTREA. Sinalar a data e lugar preferente de estrea. Posteriormente deberán iniciarse as xestións para pechar dita data e lugar.

6. OUTROS DATOS.
Recoller toda aquela información que se considere relevante. Por exemplo: Público ao que esta destinado, Xénero, etc.

ANEXOS

O proxecto debe incluir o texto en galego ou traducido ao galego.
Posteriormente incluirase o deseño de luces, son, etc. Unha vez elexida tamén será imprescindible adxuntar o permiso do autor/a do texto.

PRAZOS

O PRAZO DE PRESENTACIÓN DE PROXECTOS ESTARÁ ABERTO DESDE O DÍA 07 DE NOVEMBRO DE 2011 ATE O 06 DE DECEMBRO DE 2011.

O DÍA 07 DE DECEMBRO ÁBRESE A SEMANA DE REVISIÓN DE PROXECTOS. DURANTE ESTE TEMPO A EQUIPA DIRECTIVA OU A COMISIÓN CREADA PARA A REVISIÓN ESTARÁN ENCARGADAS DE REVISAR OS PROXECTOS PARA VERFICIAR QUE CUMPLAN TODAS AS CONDICIÓNS DESCRITAS.

O DÍA 14 DE DECEMBRO COMUNICARASE AOS SOCIOS E SOCIAS QUE PRESENTARON PROXECTOS SE ESTÁN OU NON ADMITIDOS. ASIMESMO, ÁBRESE UN SEGUNDO PERÍODO DE ADMISIÓN, CUNHA DURACIÓN DE 7 DÍAS PARA RECTIFICACIÓN DE ERROS NO PROXECTO PRESENTADO.

O DÍA 21 DE DECEMBRO PRESENTARANSE OS PROXECTOS E QUEDARÁN A DISPOSICIÓN DOS ASOCIADOS E ASOCIADAS PARA A SÚA CONSULTA. OS PROXECTOS ESTARÁN DISPOÑIBEIS EN PAPEL NO LOCAL DA ASOCIACIÓN. ASIMESMO, ENVIARANSE POR CORREO ELECTRÓNICO A TODAS AS PERSOAS ASOCIADAS. O PRAZO DE CONSULTA DURARÁ 1 SEMANA.

NA ÚLTIMA ASEMBLEA DE DECEMBRO, QUE ESTÁ PREVISTA PARA O DÍA 29, LEVARASE A CABO A VOTACIÓN E ELECCIÓN DO PROXECTO. A ASEMBLEA CELEBRARASE ÁS 19.00 HS EN PRIMEIRA CONVOCATORIA, E ÁS 19.15 HS EN SEGUNDA, MOMENTO NO QUE TERÁN LUGAR A VOTACIÓN E ELECCIÓN DE PROXECTO. SENDO ÉSTE, SEN LUGAR A CAMBIOS, O PRIMEIRO PONTO NA ORDE DO DÍA.

A VOTACIÓN É PRESENCIAL. A PARTICIPACIÓN NA VOTACIÓN IMPLICA A REVISIÓN DOS DIVERSOS PROXECTOS POR PARTE DO VOTANTE.

O SISTEMA DE VOTACIÓN É O SEGUINTE:
CADA SOCIO EMITE 3 VOTOS:
- 3 PONTOS
- 2 PONTOS
- 1 PONTO

CUBRIRANSE NECESARIAMENTE OS TRES VOTOS POR PERSOA. A OBRA MÁIS VOTADA SERÁ A SELECCIONADA. NO CASO DE PRODUCIRSE UN EMPATE, RESOLVERASE REPETINDO O SISTEMA DE VOTACIÓN SÓ COS TEXTOS EMPATADOS.

O PROXECTO SELECCIONADO DEBE ESTREARSE DURANTE O ANO 2012.

ANIMADEVOS A PARTICIPAR!
A SELECIÓN DE PROXECTOS SERÁ MOITO MÁIS RICA CANTO MAIOR SEXA A NOSA PARTICIPACIÓN.


Se tedes algunha dúbida podedes contactar coa equipa directiva.

Comentarios